Við skruppum í blíðunni síðasta laugardag með hestana á Kaldbakstjörn þar sem við áttum frábæran dag í snilldar færi á ísnum.  Tókum myndir af nokkrum hestum og erum núna að týna þær inn.  Næstur í röðinni er Sigursteinn.  Hann er á 6.vetur og þegar kominn með 1. verðlaun.  Hann er frúarhesturinn á bænum og stendur sig með prýði.  Ótrúlega skemmtilegur, næmur og gerir allt sem maður biður hann um, þ.á.m. að dilla sér á ísnum :)

Dáti er stóðhestur á fimmta vetur undan gæðingamóðurinni Birnu Baldursdóttur (8,17) og Hágangi frá Narfastöðum.  Hann er í stöðugri framför og mætir vonandi á kynbótabrautina í vor.  Hann er gríðarlega stór og myndarlegur, stórstígur og hágengur alhliðahestur með stáltaugar.  Annars tala myndirnar sínu máli :)

Nú er búið að taka nýju reiðhöllina í Saltvík í notkun þó formleg vígsla hafi ekki farið fram.  Töluverð vinna er enn eftir í henni en þó er vel hægt að nota hana.  Á laugardaginn var opinn dagur og skelltum við okkur með tvo stóðhesta á kerrunni.  Gaman er líka að geta nú loksins aðeins haft krakkana með í tamningunum.  Viðja Karen er alveg hestasjúk og lét ekki bjóða sér neitt minna en fyrstu verðlauna stóðhest undir hnakkinn.  Enda er Sigursteinn ótrúlegur höfðingi og lét sig ekki muna um að tölta nokkra hringi með skvísuna :)

Við erum óvenju vel byrg af stóðhestum þessa dagana og svo komið að við getum ekki haft neinar hryssur á húsi.  Þetta eru meðal annarra frændurnir Bogi og Dáti.  Þeir eru báðir á fimmta vetur og eru undan mæðgum.  Dáti er undan Hágangi frá Narfastöðum og Birnu Baldursdóttur (8,17) sem reynst mjög góð ræktunarmeri.  Bogi er undan Baugi frá Víðinesi og Dúsu (8,40) sem er einmitt undan Birnu.  Þeir eru að komast í form og lofa báðir mjög góðu.

Við óskum lesendum okkar gleðilegra jóla og nýs árs.  Það er löngu orðið tímabært að setja inn frétt hérna en eitt af mörgum fögrum áramótaheitum er að vera duglegri að setja inn fréttir á síðuna.  Lítið var um tamningar síðustu vikur ársins vegna leiðinda veðurfars og færðar.  Yngsti tamningamaðurinn á heimilinu lét það þó ekki hafa áhrif á sig þegar stóðinu var gefið í mokandi snjókomu í desember.  Veðrið hefur þó ekki haft áhrif á vinnuna í reiðhöllinni í Saltvík.  Þar eru menn í óða önn að gera hana tilbúna til notkunar svo hægt verði að temja í skjóli frá veðri og vindum.

Við skruppum í dag í Hóla í Hjaltadal til að taka út og sækja 2 tryppi sem við áttum í tamningu þar.  Það eru Röskva og Gýgur frá Húsavík.  Þau eru sammæðra, undan Gjóstu frá Möðrudal (7,59).  Gýgur er jarpur undan Gýgjari frá Auðsholtshjálegu og Röskva er rauðblesótt undan Rökkva frá Hárlaugsstöðum.  Þau eru búin að vera á Hólum í frumtamningu í 7 vikur og búið að kenna þeim mjög mikið á þeim tíma.  Við erum mjög ánægð með þau bæði og teljum þau lofa mjög góðu.  Gýgur er skrokkmjúkur, gefur vel eftir í hnakka, með flott skref og greinilega mjög laus gangur í honum.  Röskva sýnir ekki gang en með fínan fótaburð og lofar góðu.

Tamningar eru aðeins að komast af stað hjá okkur þetta haustið.  Tvö tryppi eru á Hólum, þau Röskva og Gýgur sem eru sammæðra undan Gjóstu.  Feður þeirra eru Rökkvi frá Hárlaugsstöðum og Gýgjar frá Auðsholtshjáleigu.  Hesthúsið er svo hálffullt af stóðhestum á ýmsum aldri.  Upphaflega ætluðum við bara að taka þá sem eru á tamningaaldri en enduðum á að taka ungfolana líka í smá fortamningu.  Til stendur að gelda tvo þeirra, Sigurvin og Dýra, sem eru ekki nógu fallegir til að vera stóðhestar.  Vignir fór svo með Búa í Þúfur til Mette enda stóð hún sig frábærlega með báða foreldra hans.  Hér er smá yfirlit yfir þá sem við höfum haft undir höndum síðustu daga:

     Bessi frá Húsavík f.2010 F: Auður frá Lundum (8,46)  M: Dúsa frá Húsavík (8,40)

     Maríus frá Húsavík f: 2009 F: Kappi frá Kommu (8,51)  M: Skrýtla frá Húsavík (8,10)

     Búi frá Húsavík f: 2008 F: Hróður frá Refstöðum (8,39)  M: Dúsa frá Húsavík (8,40)

     Bogi frá Húsavík f: 2007 F: Baugur frá Víðinesi (8,48)  M: Dúsa frá Húsavík (8,49)

     Dáti frá Húsavík f: 2007 F: Hágangur frá Narfastöðum (8,31)  M: Birna frá Húsavík (8,17)

Hér eru svo myndir sem við tókum í vikunni af þeim Dýra, Maríusi og Bessa.

... að við erum enn á lífi þó heimasíðan hafi ekki borið þess merki undanfarið.  Orsökin liggur ekki í skorti á fréttum heldur framtaksleysi umsjónarmanns síðunnar :) Umræddur umsjónamaður skellti sér í göngur á heimahögunum í Þistilfirði í byrjun september.  Þetta eru þriggja daga göngur og gist er í gangnakofa í tvær nætur. Veðurguðirnir sýndu ekki alveg sínar bestu hliðar þessa daga og landið ekki auðvelt yfirferðar en það var allt bætt upp með taumlausri gleði í kofanum á kvöldin.  Helgina eftir var svo haldið áfram að smala og réttað á Gunnarsstöðum.  Við skelltum okkur þangað öll fjölskyldan en Vignir var upptekinn við gæsaskytterí á meðan aðrir drógu fé í dilka.

      Af hrossaræktinni er það helst að frétta að Dúsa (8,40) kom því miður tóm frá Spuna frá Vesturkoti og skelltum við henni þá í hólf hjá Klakanum frá Skagaströnd og er hún fengin við honum.  Móðir hennar, Birna (8,17) Baldursdóttir, er því miður tóm en einhver benti okkur nú á að það breytti nú varla miklu því enda dræpist nánast allt undan henni :/ En ætlum þó reyna eitt sumar í viðbót með þá gömlu enda mikil gæðingamóðir. 

Loksins eru myndir frá Landsmótinu að týnast inn. Komnar eru myndir af öllum 4 og 5 vetra kynbótahrossum, hryssum og stóðhestum. Smellið á "Myndir" til að sjá þær. Á næstunni munu svo bætast við myndir í hina flokkana sem búið er að setja inn.

     Annars eru það helst að frétta að heyskap er lokið og hryssurnar farnar að týnast heim frá stóðhestum. Gjósta (7,59) er fengin við Sigursteini frá Húsavík, Dalla er fengin við Klakanum frá Skagaströnd og Ópera (7,86) við Kompási frá Skagaströnd. Svo er Dúsa (8,40) komin heim eftir sæðingar hjá Spuna frá Vesturkoti og Skrýtla (8,10) og Sigurgyða (7,85) eru enn í hólfum hjá þeim bræðrum Kapli og Kappa frá Kommu.

     Um síðustu helgi skelltum við hrossum á kerruna og brunuðum í Þistilfjörðinn þar sem ný reiðskemma og hesthúsaðstaða voru vígð á Gunnarsstöðum. Þetta var hin besta skemmtun og voru a.m.k. 60 manns ríðandi í myndarlegum hópreiðtúr, keppt var í þrautabraut og svo slúttað með mikilli grillveislu og balli í reiðskemmunni. Látum hér fylgja með myndir sem við höfum tekið undanfarið af heyskap, hestamennskunni og skrautlegu heimilishaldinu :)

Veðurblíðan lék við okkur nú um helgina. Heilmikið var um að vera á Sail Húsavík og Mærudögum, meðal annars voru félagsmenn Grana með gæðingasýningu. Börn og fullorðnir sýndu sitt besta og m.a. voru sýndir 3 fyrstu verðlauna graðhestar í eigu Granamanna, Sigursteinn okkar frá Húsavík, Hraunar frá Húsavík og Helgi frá Neðri-Hrepp. Við enduðum þessar góðu helgi með gullfiskaveiðum í Krókódílatjörninni hér við Húsavík :)

Vinnan slítur frítímann algjörlega í sundur fyrir okkur svo varla hefur gefist tími í taka myndir eða setja inn fréttir. En nú skal ráðin bót á því :)  Daginn sem við komum heim af Landsmótinu kastaði Skrýtla brún stjörnóttir glaseygðri hryssu undan Hófi frá Varmalæk. Hún er glannaleg til augnanna sú stutta en það er þó skárra að hafa glaseygt á báðum augum en ekki öðru. Skrýtla er svo farin undir Kapal frá Kommu sem er bróðir Kappa, undan Kjarnorkur frá Kommu og Álfi frá Selfossi.

Eins og margir hestamenn erum við nýskriðin heim af Landsmóti. Óhætt er að segja að mótið hafi verið ótrúlega sterkt og sennilega aldrei verið eins mikið af kynbótahrossum í hæsta gæðaflokki. Það sem stendur þó uppúr eru nokkrar sýningar og gæsahúðar-augnablik sem eiga eftir að lifa í minningu margra næstu árin og hafa örugglega lagt nýjar línur. Má þar nefna skeiðsprettina í ræktunarbússýningunni frá Efri-Gegnishólum þar sem fjórir stóðhestar riðu gaffal á blindskeiði og fipaðist enginn þegar þeir mættust og sýningu Söru Ástþórs á hryssunni sinni Dívu frá Álfhólum á yfirferðar tölti með hendur uppí loft :) Síðast en ekki síst er svo auðvitað ótrúleg sýning Þórðar Þorgeirs á Spuna frá Vesturkoti. Held við getum fullyrt að enginn hafi nokkurn tíman séð eins vel riðna sýningu á eins góðum hesti og setti Þórður klárlega nýjan standard með þeirri sýningu.

        Berglind myndaði heilan helling á mótinu og náði að mynda nánast öll kynbótahrossin. Nú bíður mikið verk að fara í gegnum og flokka mörg þúsund myndir en þær fara vonandi að týnast inn á næstu dögum og látum við vita af því. En látum hér fylgja nokkrar myndir til að byrja með, hver úr sinni áttinni. Á síðustu tveim eru þau Gígja og Jens Einars en hann brá á leik eftir að hafa séð þessa fínu mynd af Gígju og stillti sér upp við blómapottana inní hringnum :)

Dúsa kastaði nú í vikunni og fengum við gullfallegan vindóttan stjörnóttan hest undan Glym frá Innri-Skeljabrekku. Þetta er fimmta hestfolaldið í röð hjá henni og erum við orðin frekar langeyg eftir hryssu undan henni. En folinn er gríðarlega flottur og enn eitt stóðhestsefnið. Skellum hér með einni mynd af honum og annarri af hryssunni undan Óperu og Kappa. Hún er ótrúlega gæf leiðist ekkert að láta leika við sig. "Já sæll" gæti þessi mynd heitið :)

Árleg firmakeppni Grana var haldin 16. júní og stilltum við upp nýju liði að þessu sinni. Berglind vék sæti og tók Bjartur slaginn í staðinn. Þetta var hans fyrsta mót og var hann alveg í skýjunum og kallaði "Ég er sigurvegarinn" hástöfum þegar hann reið útaf :) Ekki var svo verra að hesturinn sem hann fékk að láni heitir líka Bjartur. Vignir keppti á Sigursteini og varð í 2. sæti á eftir Gísla Har. á Hraunari. Það voru því tveir fyrstu verðlauna stóðhestar í efstu sætunum.

Það hefur sennilega verið eitthvað í loftinu í fyrrinótt því þá köstuðu tvær hryssur hjá okkur. Gjósta kastaði rauðstjörnóttri hryssu undan Sigurvin okkar en þetta var önnur tilraun okkar til að fá vindótta hryssu undan þeim. Í fyrra kom brúnn hestur en það er þó huggun að hafa fengið hryssu þó hún hafi ekki verið vindótt. En þetta verður sennilega síðasta folald Gjóstu. Svo kastaði Sigurgyða gríðarlega skrautlegum jarpskjóttum fola sem er undan Kapli frá Kommu. Kapall er bróðir Kappa, undan Kjarnorku frá Kommu og Álfi frá Selfossi. Hann er mjög skondinn og boppar um á hágengu brokki eins og móðirin gerði á sínum tíma :)

4 vetra stóðhestar

5 vetra stóðhestar

6 vetra stóðhestar

7 v. og eld. stóðhestar

 

 

5 vetra hryssur

6 vetra hryssur

7 v.og eld. hryssur

Við kíktum á yfirlitssýningu á Vindheimamelum á miðvikudaginn. Þar voru sýnd um 200 hross svo af nógu var að taka og mikið af úrvals gæðingum. Sigursteinn okkar var sýndur þarna og hækkaði úr 8,0 í 8,5 fyrir hægt tölt og stimplar sig vel inn sem frábær fjórgangshestur. Berglind tók heilan helling af myndum og er nú að vinna í að flokka þær. Myndir munu koma í tenglalistann undir "Myndir" hér við hliðina.

Sigursteinn frá Húsavík fór í dag í kynbótadóm á Vindheimamelum og endaði með 8,06 í aðaleinkunn. Hann fékk 7,91 fyrir sköpulag og 8,15 fyrir hæfileika. Sköpulagseinkunnin kom okkur verulega á óvart en við vorum viss um að hann færi vel yfir áttuna enda þykir okkur hann bara nokkuð fallegur. En við erum þræl sátt við 8,15 í hæfileikaeinkunn á 5 vetra klárhesti :)

Fyrsta folald ársins kom í heiminn í fyrradag. Ópera (7,86) kastaði brúnni hryssu undan Kappa frá Kommu. Hún er stór og mjög falleg með "Kappa-háls", hátt settan og grannan. Ekki spillir svo fyrir að hún veður um á hágengu tölti :)

Lítið hefur verið um fréttaflutning hjá okkur síðkastið því Berglind skrapp í 10 daga sauðburðarfrí í Gunnarsstaði. Þó ekki sé mikið frí fólgið í sauðburðarvinnu þá er þetta sérlega skemmtilegur tími. Veðurguðirnir voru bændum ekki sérlega hliðhollir svo ekki var hægt að setja fé út á tún. Þrátt fyrir það gekk allt vel og fénu ætti ekki að hafa orðið meint af. Bjartur var hæst ánægður með að brasa í fjárhúsunum og hjálpa afa sínum að keyra dráttarvélarnar. Myndir úr sauðburði á Flickr síðu Berglindar hér.

Kappi er mættur í Fellskot og byrjaður að sinna merum. Mikið hefur verið pantað undir hann og hver að verða síðastur að tryggja sér pláss. Þeir sem eiga pantað geta haft samband við Maríu í S: 899-9612 þegar þeir vilja koma með hryssurnar. Greiða þarf staðfestingargjald, 25.000 m.vsk. sem er óafturkræft. Það þarf að greiðast áður en hryssunum er haldið. Hægt er að millifæra á reikn. 0567-14-400060 kt. 630708-0790. Eða hafa samband á berglind@husavikurhestar.is eða S: 868-9952.

Segja má að við höfum haldið okkar eigin stóðhestadag í dag. Bessi undan Dúsu (8,40) og Auði frá Lundum er eina stóðhestsefnið í 2010 árganginum enda vorum við óvenju heppin með kynjahlutfallið það árið. Hann fær ekki að vera í stóðinu lengur og settum við hann í girðinguna með hinum gröddunum. Til að auðvelda honum ný kynni tókum við tvo í burtu svo hann er bara með tveim sem eru nær honum í aldri. Við notuðum tækifærið og smelltum nokkrum myndum af þeim.

Búi frá Húsavík M: Dúsa (8,40) F: Hróður f. Refsst.
Sigurvin frá Húsavík M: Miskunn F: Glymur f. Innri-Sk.
Maríus frá Húsavík M: Skrýtla (8,10)  F:Kappi f. Kommu

Veðurblíðan hefur verið ótrúleg hjá okkur undanfarið og fer þurrkur að verða það eina sem hamlar gróðri. Eitthvað sem við eigum nú ekki að venjast hér fyrir norðan á þessum árstíma. Það þarf þó að gera meira en nota blíðuna til útreiða svo við skelltum okkur í dag í smá vinnu í stóðinu. Tókum nánast allt stóðið heim í hús í Steindal, klipptum hófa og gáfum ormalyf. Tryppin eru nú flest róleg og vel gæf en eru þó mishress með að vera tekin og mýld. Á morgun er svo stefnan að gelda tvo fola enda eru þeir orðnir stórir og þroskaðir. Hér fyrir neðan eru tvær myndir sem við tókum í dag. Á fyrri myndinni er Bessi sem er eina stóðhestsefnið í 2010 árganginum. Hann er undan Dúsu (8,40) og Auði frá Lundum, mjög stór og myndarlegur foli með flottar hreyfingar. Á seinni myndinni er svo Siddi í Steindal sem við leigjum af land fyrir stóðið. Þarna er karl í gamla fjósinu þar sem kennir ýmissa grasa :)

Við tókum á dögunum inn þær Döllu Birnu-dóttur og Gustuk Gusts frá Hóli-og Gjóstu-dóttur. Þær eru báðar hálfgerðar ólánshryssur og hafa því ekki verið í þjálfun undanfarið. Gustuk er á sjötta vetur og lofaði nokkuð góðu en var eitthvað skrýtin síðasta sumar. Sem skýrðist allt þegar hún kastaði í lok ágúst og virðast hún og Sigursteinn átt smá gaman saman haustið áður. Dalla var búin að vera í þjálfun í vetur, orðin verulega góð og stefndum við með hana í kynbótadóm í vor. Snemma í febrúar festi hún svo afturfót í bandinu, fékk töluverðan áverka á fótinn og hálsinn og sleit vöðva í baki. Þetta leit því alls ekki vel út og töldum við að henni yrði ekki riðið framar. En hún hefur jafnað sig ótrúlega og ætlum við nú að athuga hvort hún hafi kannski bara jafnað sig alveg.

    Tamningar ganga annars vel og stóðhestarnir báðir, Bogi og Dáti, í fínni framför. Einnig er Blettur Klettssonur að verða verulega skemmtilegur og tókum við nokkrar myndir af honum í dag. Hann er að verða dillandi mjúkur á tölti og er efni í skemmtilegan keppnishest.

Á föstudaginn brugðum við undir okkur betri fætinum og skelltum okkur á Krókinn á stóðhestaveisluna. Þetta er ótrúlega flott framtak og vonandi komið til að vera. Heimir og Hulda voru mjög skemmtilegir kynnar og náðu upp góðri stemmingu í húsið. Þarna voru nokkrir hestar sem umfram aðra gripu augað, t.d. Álmur frá Skjálg, Gangster frá Árgerði og Óskasteinn frá Íbishóli. Svo var mjög gaman að sjá Auði Karen á Friðrik sínum, ótrúlega flott par þar á ferðinni. Hún hefur greinilega einstakt jafnvægi og hesturinn eins þjáll og geðgóður og hugsast getur. Svo er nú ekki hægt annað en að minnast á Ölfu frá Blesastöðum sem við vorum að berja berum augum í fyrsta skipti, verst að við vorum eiginlega orðlaus svo það er ekki hægt að skrifa mikið :)

      Á laugardeginum kíktum við svo í Narfastaði og sáum Sigurstein (undan Miskunn og Hrym) og vorum mjög ánægð með hann. Hann er alltaf að bæta sig svo við erum bara bjartsýn á framhaldið. Einnig kíktum við á Sigurvin (undan Miskunn og Glym) sem er búinn að vera rúmlega mánuð hjá Barböru á Hofi og tókum hann heim. Hann veiktist fljótlega eftir að hann kom þangað og er ekki búinn að ná sér almennilega ennþá svo hann fer í frí í bili. Við vorum þó ánægð með það litla sem náðst hefur að temja hann og útlitið á honum sem var nokkuð betra en við áttum von á þó enn vanti nokkuð uppá að það sé boðlegt fyrir stóðhest.

Við skelltum okkur á Mývatn í gær. Mótið var stórgott og veðrið eins best verður á kosið, stafalogn og heiðskýrt. Við smelltum af slatta af myndum í tölti A og stóðhestakeppninni sem eru nú komnar á netið. Þeir sem vilja fá ákveðnar myndir til eignar geta haft samband við Berglindi á berglind@husavikurhestar.is eða í 868-9952.  Hér eru allar myndirnar. Smellið svo á eitthvert af nöfnunum hér fyrir neðan til að sjá myndir af hverjum og einum.

Stefá Friðgeirsson Tryggvi Höskuldsson Ásdís Helga og Stefán Birgir Aðrir (T.d. Elvar Einarsson, Kristján Sigtryggsson og Anna Kristín)

Höskuldur Jónsson Erlingur Ingvarsson Sölvi Sigurðsson Vignir Sigurðsson

Úrslit urðu eftirfarandi:

Við höfum til gamans og fróðleiks tekið saman lista yfir hryssur sem hafa fengið við Kappa síðustu ár.

Hryssur 2008     Hryssur 2009    Hryssur 2010

Húsgangmál: Fellskot, Biskupstungum. Pantanir hjá Maríu (899-9612) eða Líneyju (899-8616).

Fyrra gangmál: Austur Landeyjar. Pantanir hjá Sigríki (893-7970).

Seinna gangmál: Hof, Höfðaströnd. Pantanir hjá Berglindi (berglind@husavikurhestar.is eða 868-9952).

Verð á tolli er 150.000 með öllu (hólfagj. sónarsk. og vsk.)

Við kíktum í Skagafjörðinn um síðustu helgi og litum á stóðhestana sem við eigum þar. Sigursteinn (undan Miskunn og Hrym) er á Narfastöðum hjá Bjarna Jónasar og lofar góðu eins og við var að búast. Það virðist ekkert vera því til fyrirstöðu að hann verði sýndur í vor. Bogi (undan Dúsu og Baugi) var á Hofi hjá Barböru Wenzl. Hann var búinn að vera þar í mánuð og orðinn nokkuð taminn. Við tókum hann heim en skildum Sigurvin (undan Miskunn og Glym) eftir í staðinn. Við höfum aðeins riðið á Boga eftir að hann kom heim og líst okkur mjög vel á hann. Hann er kominn vel af stað í gangsetningu og fer vel undir.

Fyrsta mót Grana á nýja félagssvæðinu í Saltvík var haldið í dag. Góð þátttaka var á mótinu, flott veður og gaman að máta hesta og menn við framtíðar hesthúsahverfið. Við létum ungmennafélagsandann ráða mættum með þá Simbað og Blett sem báðir eru á fimmta vetur og ekki mikið tamdir en efnilegir. Þeir voru alveg í bremsu og ekki á því að sýna það sem þeir þó geta. Nóg var þó af góðum hrossum og Granamenn greinilega vel hestaðir þessa dagana. Útsýnið þarna er einstaklega fallegt með fóann og Kinnafjöllin í baksýn. Reiðhöllin er risin og verður vonandi tilbúin innan tíðar en ekkert hesthús er þó komið.

Fullorðnir:	Börn, þátttakendur:
1. Einar V. Einarsson og Rausn frá Valhöll 2. Gísli Haraldsson og Hraunar frá Húsavík 3. María Marta Bjarkadóttir Víkingur frá Úlfsstöðum 4. Svanhildur Jónsdóttir Greifi frá Hóli 5. Einar Gíslason og Bjarklind frá Húsavík	Berta María Dagný Anna Iðunn Bjarnadóttir Vignir Már

Í gær, laugardaginn 12. febrúar, var haldin folaldasýning í Saltvík. Við mættum með 4 folöld, 2 hryssur og 2 hesta. Árangurinn var nú framar vonum og voru þau öll í efstu sætum í sínum flokkum. Úrslit voru eftirfarandi:

Hestar:	Hryssur:
1. Bessi frá Húsvik, eig. og rækt. Vignir Sigurólas. F: Auður frá Lundum M: Dúsa frá Húsavík 2. Hjörtur frá Húsavík, eig. og rækt. Berglind Sigurðard. F: Sigurvin frá Húsavík M: Gjósta frá Möðrual 3. Hlynur f. Víðivöllum-Fremri, eig. Erlingur og Diljá F: Vökull frá Síðu M: Albína frá Lambleiksstöðum	1. "Jörp" frá Húsavík, eig. og rækt. Vignir Sigurólas. F: Kappi frá Kommu M: Sigurgyða frá Húsavík 2. Draumadís frá Garði, eig. og rækt. Enrice og Guðmundur F:Glymur frá Innri-Skeljabrekku M: Náttdís frá Garði 3. Óskhyggja frá Húsavík, eig. og rækt. Vignir og Vilberg F: Fróði frá Staðartungu M: Ópera frá Möðrufelli

Hér eru svo nokkrar myndir frá sýningunni, á fyrstu myndinni er Bessi og á annarri er Hjörtur.

Glæsir og Hjörtur eru nú til sölu hjá okkur. Glæsir er fallegur foli á fimmta vetur, efni í fínasta reiðhest á góðu verði. Hjörtur er á fyrsta vetri, stór og fallegur og með mikinn fótaburð. Sjá nánar um þá hér.

Þessar myndir eru af Kapli frá Kommu sem er að fara á þriðja vetur. Hann er bróðir Kappa, undan Kjarnorku frá Kommu og Álfi frá Selfossi. Jafnframt er hann síðasta afkvæmi Kjarnorku sem þurfti að fella fyrir aldur fram eftir að hún fótbrotnaði. Eins og myndirnar sýna er Kapall einstaklega bolléttur og fínlegur foli, faxprúður og stór. Okkur þykir hann mjög líkur Kappa þegar hann var á hans aldri nema að Kapall er faxprúðari. Einari Gíslason hestamaður hér á Húsavík tók þessar myndir af honum snemma síðasta sumar þegar hann var í merum. Enn eru laus 2-3 pláss hjá Kapli á seinna tímabili en hann verður í Heiðarbót í Reykjahverfi. Þeir sem hafa áhuga á að komast undir hann þá geta haft samband við Vigni í síma 893-7901. Til að fyrirbyggja misskilning er kannski rétt að taka fram að holdafar Kapals er í góðu lagi þó einhver gæti haldið annað :)

Búið er að reikna nýtt kynbótamat eins og flestum hestamönnum er kunnugt. Fjögur hross í okkar eigu er með 120 stig eða meira, efst er þó Díva sem fórst aðeins sex vetra gömul.

Díva frá Húsavík 123 stig

Búi frá Húsavík 121 stig

Bogi frá Húsavík 120 stig

Dúsa frá Húsavík 120 stig

Klakinn frá Skagaströnd 120 stig (við eigum hlut í honum)

Þess má einnig geta að Kappi er með 133 stig fyrir fegurð í reið sem er það hæsta sem nokkurt hross er með. Á myndinni er Díva sem við söknum sárt og gæfum mikið fyrir að hafa í ræktun hjá okkur enda var hún einstakur gæðingur.

Búið er að staðfesta fyl í 66 hryssum eftir sumarið og því nóg verið að gera hjá Kappanum. Meðal þeirra sem eru fengnar við honum eru gæðingshryssurnar Hnota frá Garðabæ, Mön frá Lækjamóti, Þruma frá Skagaströnd, Sending frá Enni, Gletta frá Ytra-Vallholti, Æðey frá Dalsmynni, Krækja frá Efri-Rauðalæk, Ösp frá Hólum, Hrísla frá Sauðárkróki og Lyfting frá Síðu.

     Gaman er einnig að segja frá því að á folaldasýningu í Hestheimum sigraði í fola-flokki Kári frá Ásbrú sem er undan Kappa og Sömbu frá Miðsitju. Spennandi foli sem gaman verður að fylgjast með. Sjálfur er Kappi nú í góðu yfirlæti á Hofi og nýtur haustblíðunnar þar.

Nú þegar sumri er lokið er upplagt að líta á afrakstur ræktunarinnar þetta árið. Við fórum með átta hryssur undir stóðhesta og eru þær allar fengnar.

Dúsa frá Húsavík (8,40)	Glymur frá Innri-Skeljabrekku		Sigurgyða frá Húsavík (7,85)	Kapall frá Kommu
Birna frá Húsavík (8,17)	Búi frá Húsavík		Gjósta frá Möðrudal (7,59)	Sigurvin frá Húsavík
Skrýtla frá Húsavík (8,10)	Hófur frá Varmalæk		Miskunn frá Keldunesi (7,58)	Búi frá Húsavík
Ópera frá Möðrufelli (7,86)	Kappi frá Kommu		Kæti frá Keldunesi	Dáti frá Húsavík

Sömuleiðis fæddust átta folöld:

 

	Óskhyggja Móðir: Ópera frá Möðrufelli (7,86) Faðir: Fróði frá Staðartungu (8,59)		Bessi Móðir: Dúsa frá Húsavík (8,40) Faðir: Auður frá Lundum (8,46)
	Hjörtur Móðir: Gjósta frá Möðrudal (7,59) Faðir: Sigurvin frá Húsavík		"Hestur" Móðir: Kæti frá Keldunesi Faðir: Hófur frá Varmalæk (8,34)
	Marta Móðir: Skrýtla frá Húsavík (8,10) Faðir: Kappi frá Kommu (8,51)		Sigurlína Móðir: Miskunn frá Keldunesi (7,58) Faðir: Dáti frá Húsavík
	"Hryssa" Móðir: Sigurgyða frá Húsavík (7,85) Faðir: Kappi frá Kommu (8,51)		"Hryssa" Móðir: Gustuk frá Möðrudal Faðir: Sigursteinn frá Húsavík

Við skruppum í Laufskálarétt um helgina og sáum þar helling af hrossum og enn meira af fólki. Okkur áskotnaðist sumarbústaður á Hólum svo við áttum góða helgi. Berglind hafði ekki farið á réttina síðan hún var á Hólum fyrir sléttum 10 árum og Vignir hafði aldrei farið svo það var kominn tími til. Einhver viðskipti fóru nú fram á réttunum en við tókum þó ekki þátt í þeim enda þyrftum við frekar að fækka hrossunum en fjölga þeim :)

    Framhalds-tamningar eru aðeins að fara af stað hjá okkur. Þrír fjögurra vetra geldingar sem voru gerðir reiðfærir síðasta vetur eru núna á húsi. Það eru Glæsir undan Kaspari frá Kommu, Blettur undan Kletti frá Hvammi og Simbað undan Sprota frá Hafrafellstungu. Þeir eru allir þægilegir viðureignar og verður væntanlega hent út þegar búið verður að nota útúr járningunni.

Við skruppum inní Eyjafjörð í gær og sóttum Dúsu (8,40) og Skrýtlu (8,10). Þær hafa báðar verið hjá stóðhestum í dágóðan tíma og tvisvar búið að sóna þær geldar svo okkur leist ekkert orðið á blikuna enda tvær af okkar bestum merum. Okkur til mikillar gleði reyndust þær þó báðar fengnar og með nokkuð stóru fyli svo þær ættu að kasta fyrri partinn í júlí á næsta ári. Dúsa er fylfull við Glym frá Innri-Skeljabrekku og Skrýtla við Hófi frá Varmalæk. Gaman var að sjá folöldin eftir svona langan tíma enda hafa þau stækkað og þroskast mikið. Dúsa er með hestfolald, Bessa, undan Auði frá Lundum og Skrýtla er með merfolald, Mörtu, undan Kappa frá Kommu. Bæði eru þau mjög hreyfingafalleg svo við komum afskaplega sátt eftir þessa ferð.

       Í leiðinni komum við við í Kommu hjá Vilberg og skoðuðum tvær hryssur sem höfðu verið hjá Klakanum frá Skagaströnd sem er undan Álfi frá Selfossi og Sunnu frá Akranesi. Hann er bara veturgamall en greinilega vel frjór því hryssurnar voru báðar með stærðar fyljum. Okkur leist mjög vel á kappann, lofthár, hálslangur og faxprúður. Við látum hér fylgja með mynd af Klakanum og aðra af meistara Vilberg á eðalvagni sínum sem kallar ævinlega fram bros enda líkist hann frekar farartæki sem maður ætti von á að sjá á Indlandi :) Rétt er að taka fram að Vilberg var að vísa okkur til vegar og leit þess vegna undan :)

Gustuk kastaði brúnni hryssu nú á dögunum. Sú stutta hefur ekki enn fengið nafn en hún kom í heiminn daginn sem Óli pabbi Vignis var áttræður svo e.t.v. fær nú nafn sem tengist honum. Hún er óskaplega lítil enda fædd eitthvað fyrir tímann og fyrsta folald að auki. Þrátt fyrir það er hún mjög spræk, hleypur um og leikur sér eins og folöld eiga jú að gera. Við þurfum svo væntanlega að færa þær mæðgur heim að húsinu í Steindal svo þær geti gengið við opið hesthúsið og varist haustbleytunum sem koma væntanlega á næstu vikum.

Gustuk er 5 vetra hryssa sem við eigum undan Gusti frá Hóli og Gjóstu. Hún er nokkuð efnileg með góðan fótaburð og fer vel undir manni. Við vorum orðin nokkuð ánægð með hana síðasta vetur en í sumar hefur hún verið alveg ómöguleg, kviðmikil og leiðinleg til reiðar. Þrátt fyrir að við höfum riðið á henni og teymt hana töluvert breyttist ekkert. Vignir kom svo heim einn daginn og var þá búinn að finna skýringuna á öllu saman. Hún er fylfull og kastar væntanlega núna á næstu vikum !! Ekki nema von að greyið væri óhress með þessar æfingar okkar :) Hún hefur væntanlega fengið við Sigursteini þegar þau voru saman á húsi síðasta haust. Hinsvegar kannast enginn við að hafa komið að þeim saman en enginn annar kemur þó til greina. Slysaföng hafa nú oft reynst gæðingar og vonum við bara að svo verði nú.

 

Eitt og annað hefur gerst síðan við skrifuðum fréttir síðast en byrjum bara á helginni. Vignir varði henni í heyskap en Berglind, Bjartur og Viðja Karen skruppu á Einarsstaðamót. Mikið var af góðum hrossum og veðrið eins og best verður á kosið, frekar of heitt ef eitthvað er. Mörg reynd keppnishross voru á mótinu og er gaman að sjá hesta eins og Tristan frá Árgerði sem batna með hverju árinu. Ekki er síður skemmtilegt þegar óþekkt hross stela senunni eins og gráskjótt Nagladóttir, Þruma frá Akureyri, í eigu Guðmundar og Helgu á Akureyri gerði. Þetta var hennar fyrsta mót að okkur minnir og var það eina sem þau mættu með til leiks og gerði sér lítið fyrir og sigraði bæði tölt og B-flokk.

     Tvö hross úr okkar ræktun voru á mótinu, Úði og Sigurfari frá Húsavík. Úði komst í úrslit á A-flokki en var full hlaupaglaður þegar úrslitin áttu að fara fram. Sigurfari og Þórarinn urðu í 3. sæti í ungmennaflokki. Hér eru nokkrar myndir af mótinu. Á fyrstu myndinni eru Þórarinn og Sigurfari, hinar útskýra sig sjálfar.

Helgin hér á Húsavík var mjög skemmtileg hjá okkur. Mærudagar voru um helgina og var bærinn fullur af fólki sem naut blíðunnar. Við vorum með fullt hús af fólki enda nefndum við litlu skottuna í gær og fékk hún nafnið Viðja Karen. Eitt af skemmtiatriðunum á mærudögum var gæðingasýning Grana og var Vignir þar með Sigurstein. Það gekk ljómandi vel og tók Sigursteinn því mjög vel að vera kippt úr hólfi frá hryssum, skreyttur með borðum og riðið fram og til baka, ferð eftir ferð. Sigursteinn er fjögra vetra, undan Hrym frá Hofi og Miskunn.

Hryssurnar eru farnar að týnast undir stóðhesta aftur. Í vikunni fórum við vestur í Víðidalstungu með Sigurgyðu (7,85) undir Kapal frá Kommu sem er bróðir Kappa, undan Kjarnorku og Álfi frá Selfossi. Skrýtla (8,10) er farin undir Hóf frá Varmalæk, Ópera (7,86) undir Kappa og Dúsa (8,40) undir Glym frá Innri-Sklejabrekku. Gjósta (7,59) er fengin við Sigursteini og mun því væntanlega kasta fyrst næsta vor. Á fyrstu myndinni erum við að líta á graðtittina í blíðunni. Á næstu er hryssan undan Miskunn og Dáta sem sýnir að það eru fleiri en mótorhjól sem fara svo hratt að það þurfi að halla sér hraustlega inní beygjurnar. Á þriðju myndinni er Hjörtur á fullri ferð á svifmiklu brokki og á síðustu eru þeir Sigurvin og Dúi sem er veturgamall foli undan Birnu (8,10) og Sigursteini.

Við höfum loksins fengið jeppann til baka en það hefur valdið okkur smá vandræðum undanfarið að komst ekkert með hestakerruna. Hrossin eru tvístruð um alla koppagrundir og nokkur höfuðverkur að koma graðfolum, folaldsmerum og reiðhrossum fyrir svo vel sé. Í dag fluttum við folaldsmerar útí Steindal og lokuðum af þannig að Búi eða hans merar kæmust ekki að girðingunni. Þessar myndir voru teknar í dag. Á fyrstu myndunum er Hjörtur sem hefur afskaplega gaman af því að láta horfa á sig. Hann er undan Gjóstu og Sigurvin og átti að verða vindótt meri og því hvorki af réttu kyni né réttum lit en kann öll réttu "múvin".  Á síðustu myndinni er Búi með skutlunum sínum.

Loksins gafst færi á að ná myndum af Sigursteini.  Aðstæður eru frekar óheppilegar til myndatöku þar sem reiðvegurinn er allur í hólum og hæðum en við náðum þó nokkrum myndum. Vignir hefur aðeins riðið á Sigursteini undanfarið og er hann mjög skemmtilegur. Alltaf jákvæður, viljugur og með frábært ganglag. Hann er ekki kominn í neinn burð ennþá en þetta lofar allt mjög góðu.

     Sigursteinn er fjögra vetra, undan Hrym frá Hofi og Miskunn frá Keldunesi. Seinni partinn í vetur var hann hjá Bjarna Jónasar á Narfastöðum en var ekki sýndir frekar en mörg önnur tryppi vegna pestarinnar.

 

Skrýtla (8,10) kastaði í fyrrinótt brúnni hryssu undan Kappa frá Kommu. Vignir var svo heppinn að ná þeim mæðgum rétt þegar sú stutta kom í heiminn.  Við erum að sjálfsögðu mjög fegin að hafa fengið hryssu en Skrýtla á fyrir fola, Maríus, undan Kappa sem er mjög álitlegur svo hér er um alsystkini að ræða. Nú eru kynjahlutföllin orðin jöfn og bara ein hryssa eftir að kasta svo við krossleggjum fingurna að hún komi líka með hryssu.

Þetta eru tvö af folöldunum sem fæddust hjá okkur í vor. Sá brúni er Hjörtur frá Húsavík, undan Gjóstu og Sigurvin. Mjög sperrtur og flottur foli en svo klárgengur að hann brokkar nánast á staðnum, hver segir svo að piaff sé hrossum ekki meðfætt :) Jarpa folaldið er Sigurlína frá Húsavík sem er undan Miskunn og Dáta. Hún er 12 folald Miskunnar sem hefur reynst einstaklega frjósöm.

Óhagstæð kynjahlutföll undanfarin ár hafa leitt til þess að við erum vel byrg af ungum graðhestum.  Þessa dagana höfum við haldið nokkrum af gömlu merunum okkar undir þá. Gjósta fór undir Sigurstein, Kæti undir Dáta og Miskunn og Birna undir Búa. Birna var í sæðingum hjá Kappa og var sónuð fengin en hefur greinilega látið. Henni hefur gengið illa að halda í sér folöldunum undanfarið og er svo komið að við erum búin að gefast upp á að keyra hana undir hesta og ætlum bara að halda henni undir dótturson sinn hann Búa. Hann er tveggja vetra undan Dúsu frá Húsavík (8,40) og Hróðri frá Refstöðum. Hann er vel stór, lofthár og fallegur foli og er með 122 í BLUP. Hér eru nokkrar myndir af honum.

Búið er að staðfesta fyl í fyrstu hryssunni þetta árið við Kappa.  Sú heppna er engin önnur en Hnota frá Garðabæ sem er með hæstu hæfileikaeinkunn klárhryssa í heiminum að því er við best vitum. Þetta gæti því verið ræktun á framtíðar heimsmethafa :)

Kæti kastaði núna í morgun hestfolaldi undan Hóf frá Varmalæk. Hann er rauðblesóttur, sokkóttur og með vagl í auga.  Ekki líta kynjahlutföllin vel út enn sem komið er en við vonum að þær sem eiga eftir að kasta komi nú bara með hryssur.  Undanfarin ár hefur gætt mikils ójafnréttis og karlkynið verið allsráðandi svo nú hlýtur að vera nóg komið.

     Kæti er tuttugu vetra og er þetta hennar tíunda folald. Meðal afkvæma hennar eru Úði og Skrýtla (8,10) frá Húsavík. Mikil prýði er af Kæti en hún er mjög framfalleg og faxprúð, sannkölluð stóðmeri eins og myndin sýnir.

Búið er að skrá Kappa á kynbótasýningu í Hafnarfirði nú í lok mánaðarins. Hann hefur verið við góða heilsu þrátt fyrir kvefpestina sem herjað hefur á hans slóðum undanfarnar vikur. Við vonum að það þýði að hann sé búinn að smitast án þess að verða mjög veikur en eigi það ekki eftir. Höskuldur dýralæknir skoðaði hann um daginn og mat hann fullkomlega í lagi svo nú krossleggjum við alla fingur og tær og vonum að ekkert komi uppá.

     Þeir sem greitt hafa staðfestingargjald fyrir hryssur í sæðingar geta sett sig í samband við Höskuld dýralækni eða Ingólf á Dýrfinnustöðum þegar hryssurnar eru að byrja í látum.

Við höfum verið skammarlega léleg við að setja inn fréttir á síðuna enda tvö eldgos orðið síðan við skrifuðum síðast !!  Aðal ástæðan fyrir því hefur nú einfaldlega verið sú að það hefur ekki verið neitt sérstakt í fréttum hjá okkur.  Í apríl tókum við inn tvö af folöldunum, það voru tveir folar undan Sigurstein, annar undan Kæti og hinn undan Birnu.  Gömlu merarnar ráð orðið verr við það að mjólka allan veturinn svo við ákváðum að venja undan þeim. Báðir eru þeir stórir og myndarlegir, á myndinni vinstra megin er folinn undan gæðingamóðurinni Birnu sem ekki hefur enn fengið nafn.  Sigursteinn er enn á Narfastöðum og ber Bjarni honum alltaf jafn góða söguna og stefnir með hann í dóm í vor. Þessa dagana erum við að ákveða hvaða hesta við ætlum að nota í sumar, það verða Glymur frá Innri-Skeljabrekku, Kvistur frá Skagaströnd, Kapall frá Kommu og e.t.v. Kappi, Gýgjar og einhverjir af folunum okkar hérna heima. Mikið er af góðum hestum verður á svæðinu í sumar svo úr vöndu er að ráða.

     Á myndinni hægra megin eru graddarnir í Eyvík, lengst til vinstri er Sigurvin, svo Búi, Bogi, Dáti og lengst til hægri er skjóttur foli sem Ingólfur og Karin eiga.

Bóas frá Húsavík er seldur. Móðir hans er Dúsa okkar sem er undan Birnu Baldursdóttur og Ypsilon frá Holtsmúla. Dúsa og Birna eru báðar með mjög góð fyrstu verðlaun og var Dúsa í fjórða sæti í flokki 6 vetra hryssa á Landsmótinu 2006. Faðir Bóasar er Kappi frá Kommu sem flestir kannast við. Kaupendur er vaskur hópur sunnlendinga sem hefur skipt honum í 60 hluti. Við munum eiga einn hlut í honum áfram til gamans. Við óskum nýjum eigendum til hamingju og vonum að Bóas verði þeim til sóma um ókomin ár :)

Mikið hefur verið spurst fyrir um Kappa undanfarið. Margir eru að velta fyrir sér hver stefnan sé með hann og hvar hann verði næsta sumar. Því miður getum við lítið sagt að svo komnu. Kappi er í þjálfun hjá Mette og er stefnt með hann á Landsmót. Gangi það allt eftir verður hann líklega á einu löngu gangmáli eftir mótið. Það mun því ekki liggja endanlega fyrir hvernig þetta verður fyrr en líður á vorið.

Mjög gott veður hefur verið hér undanfarna daga. Snjóinn hefur allan tekið og tíðin minnir alls ekkert á vetur. Gallinn við snjóleysið er þó sá að það verður eiginlega aldrei alveg bjart úti. Hrossin voru öll komin á gjöf en vegna blíðunnar tókum við þau fullorðnu sem eru í mjög góðu standi og settum þau aftur á beit. Simbað hans Bjarts er svo farinn austur í Gunnarsstaði í tamningu en Þórarinn bróðir Berglindar er á Hólum og ætlar að temja á Gunnarsstöðum í jólafríinu.

Haustið hefur verið frekar gott fyrir útigangshrossin og ekki verið þörf á að gefa þeim hey. Mikið hefur þó snjóað hér síðustu daga svo við ákváðum að færa folaldsmerarnar úr hólfinu sem þær voru í og heim í Steindal þar sem þær fá rúllur og ganga við opið hesthús. Alltaf er gaman að sjá folöldin leika sér og spá í hreyfingar þeirra þó þau séu almennt ekki glæsileg á þessum tíma. Hundurinn okkar Katla vekur yfirleitt mikla lukku meðal folaldanna og gaman að fylgjast með þeim montast í kringum hana. Þau folöld sem okkur finnst sýna hvað skemmtilegastar hreyfingar eru Maríus (Undan Kappa og Skrýtlu) og Sigurvon (Undan Hófi og Miskunn). Myndavélin var meðferðis en því miður snjóaði svo mikið að hún kom að litlu gagni.

      Vegna snjókomunnar er oft fínasta færi í bænum og er Vignir aðeins farinn að ríða á Sigursteini sem er stóðhestur á fjórða vetur og Skreytingu sem er Þristsdóttir á sjötta vetur. Um daginn bitist svo frétt af Sigurvin (undan Glym frá Innri-Skeljabrekku og Miskunn) á heimasíðu Glyms á www.glymur.blog.is

Af tæknilegum ástæðum höfum við ekki getað uppfært síðuna hjá okkur undanfarið en nú verður gerð bót á því. Við erum búin að taka fjóra fola á hús sem allir eru að fara á fjórða vetur. Fyrstan ber nú að nefna Sigurstein sem er grár graðfoli undan Hrym frá Hofi og Miskunn. Mjög fallegur hestur sem við höfum mikla trú á. Svo eru þrír geldingar, Blettur undan Klett frá Hvammi, Glæsir undan Kaspar frá Kommu og Simbað undan Sprota frá Hafrafellstungu. Folarnir fara vel af stað en við reiknum nú með að vinna töluvert með þá í hendi áður en við förum að ríða á þeim. Bjartur er mikið með okkur í hesthúsinu og er mjög áhugasamur um tamningarnar en einum of hjálplegur á köflum. Hann á Simbað og hefur sérstaklega áhuga á að stjórna sjálfur í honum. Sem betur fer er hann ótrúlega þægur og taugasterkur og sýnir ungum eiganda sínum mikið umburðarlyndi. Ekki er síðra að folinn er með frábært ganglag og flottan fótaburð.

      Aðrar fréttir eru þær að nú eru samtals 83 hryssur fengnar við Kappa. Enn er möguleiki að þeim geti fjölgað því nokkrar hryssur eru hjá honum ennþá. Við látum hér fylgja með tvær myndir af þeim félögum Bjarti og Simbað.

Það gengur á ýmsu hjá okkur í hrossaræktinni þessa dagana. Góðu fréttirnar eru þær að Sigurgyða (7,85) og Skrýtla (8,10) eru báðar fengnar við Kappa. Það þýðir að allar hryssurnar sem við höfum haldið í sumar eru fengnar. Slæmu fréttirnar eru þær að hann Hákon sem var undan Sigurgyðu og Adam frá Ásmundarstöðum fannst dauður um daginn. Hann var sérstaklega flott folald og höfðum við oft á orði að hann ætti eftir að vinna folaldasýninguna í vetur. Við látum hér fylgja með eina mynd af honum.

Enn bætist í hóp þeirra hryssa sem eru fengnar þetta sumarið. Birna sem hefur gefið okkur eintóma en allt of fáa gæðinga er fengin við Markúsi. Við erum í skýjunum með það og vonum að þar sé önnur Díva á leiðinni. Miskunn er fengin við Dáta okkar sem er einmitt undan Birnu og Hágangi. Hún gengur því með sitt tólfta afkvæmi en meðal afkvæma hennar eru Sigur og Sigurgyða frá Húsavík. Einn foli, Sigurvin, undan henni og Glym frá Innri-Skeljabrekku er graður og stillti sér einstaklega vel upp fyrir myndatöku um daginn. Látum hér fylgja með eina af gæjanum.

Folaldsmerarnar eru nú að tínast heim frá stóðhestum. Í gær fórum við inní Eyjafjörð og sóttum Kæti sem var hjá Hóf frá Varmalæk. Vignir sónarkoðaði hana og var hún með stærðar fyli. Kæti er m.a. móðir Úða og Skrýtlu frá Húsavík. Undir henni núna er brúnn foli undan Sigursteini okkar og er hann rosalega flottur. Stór bolléttur, hálsgrannur og hágengur. Hefði hún reynst geld átti hún að fara undir Aris frá Akureyri sem er systursonur hennar. Einnig tókum við Óperu heim en hún er eins áður hefur komið fram fengin við Fróða frá Staðartungu. Undir henni er rauðstjörnótt hryssa undan Þóroddi og lítur hún mjög vel, er fríð fínleg og með fallegt skref.

      Við komum líka við á Uppsölum og kíktum á Dáta sem er þar með nokkrum hryssum. Þar sónarskoðaði Vignir eina hryssu sem líkleg var til þess að vera fengin enda reyndist svo vera. Það er því fyrsta hryssan sem er staðfest fengin við honum.

Kappi er nú kominn norður og var sleppt í hólf hjá hryssum um helgina. Hann lítur mjög vel út þó hann sé grannur eins yfirleitt. Þegar hann kom í Hof var hans fyrsta verk að sinna gæðingshryssunni Sefju frá Úlfljótsvatni. Auk Sefju eru fleiri góðar hryssur á leið undir hann, m.a. Hrönn frá Búlandi, Skrýtla frá Húsavík, Óskadís frá Tjarnarlandi, Ugla frá Kommu, Aría frá Grafarkoti, Spes frá Hólum og Tíbrá frá Hvanneyri.

Birna fór í gærkvöldi undir Markús frá Langholtsparti. Ekkert gekk að halda henni um daginn undir Kiljan frá Árgerði. Í gær notuðum við svo Sigurstein okkar til athuga hvort hún væri í látum. Svo reyndist vera og gripum við þá tækifærið og skutluðum henni inní Brúnir í Eyjafirði þar sem Markús er staddur og bíður þess að verða sleppt í hólf um næstu helgi. Birna er alveg ótrúlega erfið í þessum málum og hefur hún aldrei fengið í hólfið hjá hesti. Hún er svo mikið skass að það þarf alltaf að halda henni, annars þora hestarnir hestarnir ekki að koma nálægt henni.

      Undan Birnu hafa komið tvær hryssur með mjög góð fyrstu verðlaun. Dúsa er fyrsta afkvæmi Birnu með 8,40 í aðaleinkunn. Díva var annað afkvæmi hennar og fékk 8,52 fyrir hæfileika fimm vetra gömul. Hún drapst snögglega í vetur, sex vetra gömul og fylfull af sínu fyrsta folaldi undan Kappa frá Kommu. Díva var einmitt undan Markúsi svo við vonum að afkvæmið, ef eitthvað verður, verði sem líkast henni. Myndin sem fylgir með er af Dívu.

Nú fer að styttast í að Kappi komi norður í Hof á seinna gangmál. Tekið verður á móti hryssum milli 16 og 18 nú á fimmtudaginn. Kappa verður svo sleppt í hólfið á laugardeginum. Mjög vel hefur gengið hjá honum á fyrra gangmáli fyrir sunnan. Hann er enn í góðum holdum og bíðum við spennt eftir að sjá hvernig sónarskoðun kemur út. Væntanlega verður skoðað frá honum kring um næstu helgi. Aðrar fréttir af Kappa eru þær að rautt folald er komið undan honum svo hann er ekki arfhreinn brúnn eins og okkur var farið að gruna. Við látum hér fylgja með mynd sem við vorum að eignast af Kappanum.

Fyrsta hryssan sem er sónuð fylfull hjá okkur er hún Gjósta sem er fengin við Sigurvin okkar. Þetta er jafnframt fyrsta hryssan sem fær við honum svo við erum lukkuleg með það. Vonum svo bara að við fáum jarp- eða móvindótta hryssu :) Birna er farin undir Kiljan frá Árgerði sem er mjög flottur hestur undan Nagla frá Þúfu og Bliku frá Árgerði. Við krossleggjum því alla fingur og vonum að hún að fái við honum og gefi enn einn gæðinginn. Við erum þessa dagana að vinna aðeins í heimasíðunni okkar og nú er Kappi kominn með undirsíðu sem virkar eins og sjálfstæð síða hér. Á næstu dögum mun svo 2009 árgangurinn bætast í listann yfir unghross og fleiri myndir bætast á síðurnar hjá hrossunum. Hér fylgir með mynd af folanum undan Skrýtlu og Kappa sem var síðasta folaldið sem fæddist í ár. Sá stutti er bara nokkuð sperrtur og nær mikilli ferð á tölti með góðum fótaburði. Enn eitt árið voru kynjahlutföllin ekki alveg eins og við hefðum kosið, 5 hestar og 2 hryssur.

Fyrir helgi skruppum við með Dáta (undan Birnu og Hágangi) inní Eyjafjörð þar sem hann er með nokkrum merum í hólfi á Uppsölum. Miskunn okkar fór með honum auk tveggja annarra hryssa héðan frá Húsavík. Sigurvin (undan Miskunn og Glym frá Innri-Skeljabrekku) er með tveim hryssum hér við Húsavík sem og Sigursteinn (undan Miskunn og Hrym). Hafi menn áhuga er hægt að bæta við hryssum í hólf hjá þessum folum og kostar það 30.000 með öllu á fengna meri. Við látum fylgja með myndir af folunum. Á fyrstu tveim myndunum er Dáti svo Sigursteinn og loks Sigurvin.

Við lögðum land undir fót um helgina og skruppum á Fjórðungsmót. Mikið var af góðum en Kiljan frá Steinnesi stóð sennilega uppi sem eftirminnilegasti hesturinn. Systkini Kappa stóðu sig líka mjög vel, Kaspar frá Kommu var annar í B-flokki og Karítas frá Kommu var efst í ungmennaflokki. Á föstudaginn kastaði svo síðasta merin hjá okkur. Það var hún Skrýtla sem er mjög góð fyrstuverðlauna hryssa undan Kæti og Markúsi. Hún kom með brúnt hestfolald undan Kappa. Góðar líkur virðast vera á að Kappi sé arfhreinn brúnn því við vitum ekki til þess að neitt rautt folald sé til undan honum. Við látum fylgja hér með þrjár myndir frá mótinu.

Þá erum við komin heim úr fríinu í Frakklandi sem var alveg frábært og við tekur nóg stúss í kringum hrossin. Miskunn og Birna virðast hafa fundið á sér að við værum ekki á svæðinu því Miskunn kastaði daginn sem við komum og Birna um nóttina. Það þarf alltaf að losa hildarnar hjá Miskunn svo það var mjög heppilegt að hún skildi bíða þangað til Vignir kæmi heim. Undan Miskunn og Hóf frá Varmalæk kom brún hryssa en það er 11. afkvæmi hennar. Undan Birnu og Sigursteini frá Húsavík kom mjög stór brúnn hestur sem verður grár. Töluverð spenna og stress eru nú alltaf þegar kemur að köstun hjá Birnu því einstakt ólán hefur elt afkvæmi hennar. Þetta gekk þó allt vel og vonum við að þetta afkvæmi fái að lifa lengur en til 5-6 vetra. Dagarnir frá því við komum heim hafa svo farið í að færa hrossin til og frá, setja óköstuðu hryssurnar á fæðingadeildina og annað í þeim dúr.

     Búið er að skoða meirihlutann af hryssunum sem sæddar voru hjá Kappa og virðist útkoman vera fín eða um 80% fyljunarhlutfall. Endanleg niðurstaða á svo eftir að liggja fyrir um næstu helgi en þá verða liðnar tvær vikur frá því að síðustu hryssurnar voru sæddar. Við látum fylgja með eina mynd af okkur skötuhjúunum í Eiffel-turninum og aðra af folanum undan Birnu og Sigursteini.

Við erum nú stödd í Lyon í Frakklandi. Vigni er á námskeiði allan daginn en Berglind nýtur frísins, skoðar borgina og verslar. Fyrsta kvöldið hér fór hópurinn sem er á námskeiðinu saman út að borða á frægan veitingastað í borginni. Okkur var því nokkuð skemmt þegar þjónarnir báru fram matinn sem var feit bjúgu með kartöflum og uppstúf :).

       Af hrossunum er einnig allt gott að frétta. Óli, pabbi Vignis, stendur vaktina og fer nokkrar ferðir á dag til að gá að óköstuðu hryssunum ef við þekkjum hann rétt. Við tókum nokkrar myndir áður en við fórum að heiman og látum hér fylgja með mynd af hryssunni undan Óperu og Þóroddi.

 

Eldri fréttir  1   2